Այսօր Բարձրագույն դատական խորհուրդը (ԲԴԽ) դադարեցրեց Ընդհանուր իրավասության դատարանի դատավոր Դավիթ Հարությունյանի լիազորությունները, ըստ ԲԴԽ նախագահի՝ էական կարգապահական խախտման հիմքով:

168.am-ի հետ զրույցում Դատավորների միության նախագահ Ալեքսանդր Ազարյանը նախ ասաց՝ լիովին կիսում է այն մտահոգություններն ու կարծիքը, որը Դավիթ Հարությունյանն արտահայտել է այս տարվա ապրիլի 7-ին տված իր հայտնի հարցազրույցում, և որի համար Դավիթ Հարությունյանի վերաբերյալ Արդարադատության նախարարությունը կարգապահական պատասխանատվության ենթարկելու միջնորդություն ներկայացրեց:

Ալեքսանդր Ազարյանը հարցին, թե ինչպե՞ս կգնահատի այն հանգամանքը, որ ԲԴԽ-ն միաձայն, որովհետև հատուկ կարծիքի մասով որևէ բան չասվեց, քվեարկել է Դավիթ Հարությունյանի լիազորությունները դադարեցնելու օգտին:

«Ես կարծիք չեմ արտահայտի, սակայն այսօրվա ընթացքում տասնյակ մարդկանց եմ հանդիպել և կարող եմ նրանց կարծիքն արտահայտել: Ինձ այսօր հանդիպած տասնյակ մարդիկ միաձայն պնդում էին, որ Դավիթ Հարությունյանի լիազորությունների դադարեցմանը կողմ քվեարկած ԲԴԽ անդամներն  անբարոյականներ են»,- ասաց Ալեքսանդր Ազարյանը: