Միավորված ազգերի կազմակերպությունը դատապարտում է բռնություններն ու հարձակումները այսօրվա «Թբիլիսյան հպարտություն» միջոցառմանը, սոցցանցում գրում է Վրաստանում ՄԱԿ-ի ներկայացուցիչը։
«Մենք կոչ ենք անում վրացական իշխանություններին դատապարտել այս անհանգստացնող միջադեպը, պատասխանատվության ենթարկել մեղավորներին և վճռական քայլեր ձեռնարկել՝ բարելավելու բոլորի, այդ թվում՝ ԼԳԲՏՔ+ անձանց խաղաղ հավաքների և արտահայտվելու իրավունքի պաշտպանությունը»,- գրել է Վրաստանում ՄԱԿ-ի ներկայացուցիչը։
Հիշեցնենք, որ Թբիլիսիում «Թբիլիսի Փրայդ»-ը նախաձեռնել էր ԼԳԲՏՔ+ անձանց «Հպարտության փառատոնը», որը ձախողվել է։
Hayastan.news-ը տեղի լրատվամիջոցներից տեղեկանում է, որ նախքան փառատոնի մեկնարկը «Լիսի Վոնդերլենդ»-ի հարող տարածքը, որտեղ հայտարարվել էր «Հպարտության փառատոնը», զբաղեցրել են ակցիայի մասնակիցները, ովքեր դեմ են եղել միջոցառման անցկացմանը։
Մոտ մեկ ժամ ոստիկաններին հաջողվել է զսպել ցույցի մասնակիցներին, ովքեր փորձել են մտնել ներքին տարածք։ Բախումների առանձին դեպքեր են եղել: Իրավապահները մի քանի հոգու դուրս են բերել տարածքից։
Սակայն ցուցարարներին հաջողվել է ճեղքել իրավապահների պատնեշը և մտնել միջոցառման վայր։
Ի վերջո, փառատոնը չի կայացել։