Ժամը 22:30-ի դրությամբ Ադրբեջանի կողմից շարունակվող լիարժեք ահաբեկչության հետևանքով կա 27 զոհ, որոնցից 2-ը խաղաղ բնակիչներ են։ Այս մասին հայտնում է Արցախի ՄԻՊ-ը։

 

«Տուժածների թիվն այս պահին գերազանցում է 200-ը։

Թվերի մեջ չկա Ասկերանի և Մարտունու բուժհաստատությունները, քանի որ կապը դեռ հաստատված չէ»,-գրել է նա։

 

 

 

Տարհանվել են Խրամորթ, Խնաբադ, Սառնաղբյուր, Նախիջևանիկ, Մաճկալաշեն, Ճանկաթաղ գյուղերի քաղաքացիական բնակչությունը։

 

 

Ադրբեջանի կողմից Արցախի Հանրապետության նկատմամբ լայնամասշտաբ ռազմական գործողությունների հետևանքով այս պահի դրությամբ ԱՆ «Հանրապետական բժշկական կենտրոն» ՓԲԸ-ում գտնվում է 128 վիրավոր, հաղորդում է Արցախի ԱՆ-ն։

«Արևիկ» բուժմիավորումում գտնվում է 12 երեխա, որոնցից 3-ը` ծանր վիճակում: Ներկայումս նրանց վիրահատում են։

Արցախի առողջապահության նախարարությքւնը հայտնել է նաև, որ դատաբժշկական բյուրոյի տվյալներով՝ ժամը 20:00-ի դրությամբ զոհերի թիվը 25 է, որից 2-ը՝ քաղաքացիական։

 

 

Ալիևի ցեղասպան ուժերը ավելի քան 20 րոպե առաջ ավիահարված են հասցրել Մարտակերտ քաղաքին և Ասկերանի շրջանի գյուղերին։  Այս մասին հաղորդում է Արցախի պետնախարարի նախկին խորհրդական Արտակ Բեգլարյանը։

 

«Հետևանքների մասին դեռ տեղեկություն չունեմ։

 

Գնդակոծություններն ու մարտերը շարունակվում են, զոհերի/վիրավորների թիվը խաղաղ բնակիչների և զինվորականների շրջանում աճում է»,- գրել է Բեգլարյանը։

 

 

Սեպտեմբերի 19-ին Ադրբեջանի կողմից Լեռնային Ղարաբաղի նկատմամբ լայնամասշտաբ ռազմական գործողությունների հետևանքով կան զոհեր և վիրավորներ, այդ թվում՝ կանայք, տարեցներ և երեխաներ: Այս պահի դրությամբ ԼՂ ԱՆ «Հանրապետական բժշկական կենտրոն» ՓԲԸ-ում գտնվում է 80 վիրավոր, որից նախնական տվյալներով 15-ը քաղաքացիական անձիք են։ Ցավոք արձանագրվել է մահվան 5 դեպք։ 

 

 

Տեղի է ունեցել վարչապետ Նիկոլ Փաշինյանի հեռախոսազրույցը Ֆրանսիայի նախագահ Էմանուել Մակրոնի հետ: Քննարկվել է Ադրբեջանի հարձակումից հետո Լեռնային Ղարաբաղում ստեղծված իրավիճակը: Ֆրանսիայի նախագահը տեղեկացրել է, որ ստեղծված իրավիճակի կապակցությամբ Ֆրանսիան ՄԱԿ-ի ԱԽ-ում հրատապ նիստ է նախաձեռնում:

 

 

 

 Տեղի է ունեցել Նիկոլ Փաշինյանի հեռախոսազրույցը ԱՄՆ պետքարտուղար Էնթոնի Բլինքենի հետ:

Քննարկվել է Ադրբեջանի հարձակումից հետո Լեռնային Ղարաբաղում ստեղծված իրավիճակը: Երկուստեք ընդգծվել է ուժի կիրառման անթույլատրելիությունը եւ դեէսկալացիայի համար միջազգային մեխանիզմերի կիրառման անհրաժեշտությունը:

 

 

 

Անհապաղ դադարեցնել կրակը և նստել բանակցությունների սեղանի շուրջ․ ԼՂ-ն դիմել է ադրբեջանական կողմին

 

 

 

 

Այս պահի դրությամբ կրակի ինտենսիվությունը շփման գծում էականորեն նվազել է։Վիրավորների թիվը 26-ի է հասել։

 

 

Արցախի Հանրապետության նախագահ Սամվել Շահրամանյանը շտապ հրավիրել է Անվտանգության խորհրդի նիստ և քննարկել ստեղծված իրավիճակն ու հետագա անելիքները:

Հաշվի առնելով հազարավոր մարդկանց կյանքին ու առողջությանը սպառնացող վտանգը՝ պաշտոնական Ստեփանակերտը կոչ է անում միջազգային դերակատարներին և շահագրգիռ բոլոր կողմերին անհապաղ ձեռնարկել անհրաժեշտ բոլոր միջոցները՝ Արցախի նկատմամբ ագրեսիան դադարեցնելու ուղղությամբ:

Արցախի Հանրապետությունը մշտապես եղել է խաղաղ կարգավորման կողմնակից և վերահաստատում է իր պատրաստակամությունը՝ բոլոր հարցերի լուծումը տալ բանակցությունների միջոցով:  

 

 

 

Ադրբեջանի ԶՈՒ ստորաբաժանումները շարունակում են տարբեր զինատեսակներից կրակը շփման գծի երկայնքով։ Ադրբեջանի ԶՈՒ ստորաբաժանումները ձեռնարկում են նաև դիրքային առաջխաղացման փորձեր։ Արցախի Հանրապետության պաշտպանության բանակը ձեռնարկում է պաշտպանողական բնույթի միջոցառումներ։ Այս մասին հաղորդում է Արցախի ՊԲ-ն։

Այս ամենին զուգահեռ, ադրբեջանական քարոզչամեքենան կիրառում է լայնածավալ տեղեկատվական-հոգեբանական ներազդման միջոցառումներ։

Կոչ ենք անում հայկական լրատվամիջոցներին, ֆեյսբուքյան օգտատերերին, չճշտված տեղեկություններ չհրապարակել և  հետևել միայն պաշտոնական աղբյուրներին։

 

 

Այս պահին հավաքագրված տվյալների համաձայն՝ կա առնվազն 2 զոհ, այդ թվում՝ մեկ երեխա և 11 վիրավոր, այդ թվում՝ 8 երեխա՝ Ադրբեջանի հարձակումների հետևանքով։

Այս մասին հաղորդում է Արցախի ՄԻՊ Գեղամ Ստեփանյանը։

 

 

ՌԴ ԱԳՆ հայտարարությունը․ 

«Ռուսական կողմը հորդորում է հակամարտող կողմերին դադարեցնել արյունահեղությունը, անհապաղ դադարեցնել ռազմական գործողությունները և վերադառնալ քաղաքական և դիվանագիտական ​​կարգավորման ճանապարհին։

Ղարաբաղյան հիմնախնդրի խաղաղ լուծմանն ուղղված բոլոր քայլերը շարադրված են Ռուսաստանի, Ադրբեջանի և Հայաստանի ղեկավարների եռակողմ հայտարարություններում, որոնք ընդունվել են 2020-2022 թվականներին»։

 

 

Պաշտպանության նախարարության հաղորդմամբ՝ ինչպես նախորդիվ, այնպես էլ այժմ ադրբեջանական պաշտոնական հաղորդագրություններում և ԶԼՄ-ներում շարունակում է տեղ գտնել այն կեղծ պնդումը, համաձայն որի Լեռնային Ղարաբաղում առկա են ՀՀ ԶՈՒ ստորաբաժանումներ, ռազմական տեխնիկա և անձնակազմ: 

«ՀՀ ՊՆ-ն բազմիցս, այժմ ևս հայտարարում է, որ ՀՀ-ն Լեռնային Ղարաբաղում բանակ չունի»,- ասված է ՊՆ հաղորդագրությունում։

 

14:40 

 

 

Արցախի ՊՆ մամուլի ծառայությունը հաղորդագրություն է տարածել․ «Սեպտեմբերի 19֊ ին` ժամը 13։00֊ի սահմաններում ադրբեջանական զինուժը շփման գծի ողջ երկայնքով խախտել է հրադադարը` հասցնելով հրթիռահրետանային հարվածներ։

ԱՀ ՊՆ֊ն պարբերաբար հանդես կգա լրացուցիչ հաղորդագություններով»։

 

 

 

 

 

14։14 

Սկսել է զանգվածային հրետանային ռմբակոծությունը։ Այս մասին գրում է Արցախի նախկին պետնախարար Ռուբեն Վարդանյանը։

Ավելի վաղ Ստեփանակերտից կադրեր տարածվեցին, որում լսվում էին օդային տագնապի ձայներ։

 

13։23

Սկսել է զանգվածային հրետանային ռմբակոծությունը։ Այս մասին գրում է Արցախի նախկին պետնախարար Ռուբեն Վարդանյանը։

Ավելի վաղ Ստեփանակերտից կադրեր տարածվեցին, որում լսվում էին օդային տագնապի ձայներ։