Լրագրող  Թաթուլ Հակոբյանը օրեր առաջ մի գրառում էր կատարել իր ֆեյսբուքյան էջում, թե Ադրբեջանի իշխանությունները Ստեփանակերտի պարետ են նշանակել հայազգի Սարգիս Գալստյանին, որը եղել է Շուշիի «Ավան պլազա» հյուրանոցի տնօրենը։ Ըստ Թաթուլ Հակոբյանի՝ Գալստյանը իբրև թե ադրբեջանական հատուկ ծառայությունների կողմից հավաքագրված անձ է, ծառայում է Ադրբեջանի իշխանություններին և այլն։ «Սարգիս Գալստյանը, որ Ալիևի վարչակազմի կողմից նշանակվել է Ստեփանակերտի պարետ, Արցախի Ազգային ժողովի Արդարություն խմբակցության պատգամավոր Դավիթ Գալստյանի հարազատ հորեղբայրն է և Բակո Սահակյանի հետ ունի քավոր-սանիկական կապեր: Սարգիս Գալստյանը եղել է Արցախի Կրթության նախարարության աշխատակազմի ղեկավարի տեղակալ, ավելի վաղ՝ Շուշիի շրջանի վարչակազմում պաշտոնյա: Ես այս տեղեկատվությունը հիմա տալիս եմ բաց, քանի որ արդեն Ադրբեջանը հաստատեց»,- գրել էր Թաթուլ Հակոբյանը։

 

Երեկ հայտնի դարձավ, Ադրբեջանի նախագահ Իլհամ Ալիևը Ստեփանակերտի պարետ է նշանակել ազգությամբ ադրբեջանցի, ստիկանության գեներալ-մայոր Սարդար Սաֆարովին՝ դրանով փաստացի հերքելով Թաթուլ Հակոբյանի տարածած տեղեկությունը։ Hayastan.news-ին Սարգիս Գալստյանի վերաբերյալ որոշակի տեղեկություններ են հայտնի դարձել։ Նախ նշենք, որ Գալստյանը Արցախում մնացել է կնոջ հետ, իսկ երեխաներն ու թոռներն այստեղ են՝ Հայաստանում, իսկ նրա հասցեին հրապարակումների համար դատական հայց են նախապատրաստում։



Սարգիս Գալստյանը նրանց հետ դժվարությամբ, բայց ժամանակ առ ժամանակ կարողանում է կապ հաստատել, ընտանիքն անհանգստացած է։  Մեր աղբյուրի փոխանցմամբ՝ Սարգիս Գալստյանին Արցախում ադրբեջանցիները այնպես չէ, թե լավ են վերաբերվում։ Միջադեպ (մանրամասները չենք հայտոնւմ) է եղել, որ մտել են նրա տուն և փորձել են ճնշել նրան, ասել է թե՝ ոչ յուրայինի պես են վերաբերվել, ինչի մասին էլ նա հայտնել է Երևանում գտնվող արցախցի պաշտոնյաներին։ 



Սարգիս Գալստյանի հորեղբոր տղան՝ Արցախի խորհրդարանի պատգամավոր Դավիթ Գալստյանը, մեզ հետ զրույցում ասաց, որ ոչ կարող է հերքել այս տեղեկությունը, ոչ՝ հաստատել։ Նա, առհասարակ, չէր ցանկանում այս թեմայով խոսել, միայն հիշեցրեց, որ Թաթուլ Հակոբյանի հրապարակած ոչ ստույգ կամ կեղծ տեղեկությունների վերաբերյալ դատական հայց է պատրաստվում նրա դեմ զրպարտության համար։
 

Թաթուլ Հակոբյանն էլ այսօր պարզաբանել է, թե ինչու է նման գրառում արել․

«Արցախից Հայաստան տեղափոխված իմ ընկերներից մեկը, ով ծանոթ բարեկամ է Սարգիս Գալստյանին, Երևանից զանգահարել է նրան և հարցրել, թե ինչ է անում Ստեփանակերտում: Գալստյանը, ինչպես ինձ փոխանցել էր նրա բարեկամը, ասել է, որ ինքը նշանակվել է ժամանակավոր կամենդանտ, ասել է, որ ինքը խոսում է Խանքենդիից, իր բարեկամներին, ովքեր ստիպված արտագաղթել են Հայաստան, խորհուրդ է տվել վերադառնալ Ղարաբաղ:



Այս լուրը տալիս, ես չեմ նշել անուն-ազգանուն: Այն բանից հետո, երբ ադրբեջանական Աղդամ ԹԻՎԻ-ին Գալստյանի նկարով տվեց նման լուր, գուցե իմ էջեց են վերցրել, ես հրապարակեցի Սարգիս Գալստյանի անունը: Նրա նկարը ես չունեի, քանի որ իր ֆեյսբուքյան էջը այլ անունով է: Հետո գտա նրա ֆեյսբուքի էջը՝ Սարար Շուշի, բնակվում է՝ Սանկտ Պետերբուրգում:


Հնարավոր է՞ ինձ մոլորության մեջ են գցել: Գրեթե բացառում եմ:


Մի քանի օր անց մամուլում հրապարակվեց մի հրամանագիր-փաստաթուղթ, ըստ որի՝ Արցախի նախագահ Սամվել Շահրամանյանը, նախքան Արցախը գոյությունը դադարեցնելու մասին հրամանագիրը, իր աշխատակից Գալստյանին պաշտոնի է նշանակել:


Գուցե Գալստյանը ժամանակավոր կամենդանտ ասելով սա է՞ նկատի ունեցել: Դժվարանում եմ ասել:


Ինձ ասացին նաև, որ Գալստյանը և իր բարեկամները, որ տեղափոխվել են Հայաստան, պատրաստվում են իմ դեմ դատական հայց ներկայացնել:


Սա շատ ողջունելի և քաղաքակիրթ եղանակ է։ Իմ դեմ դատական հայցը, այո, կարող է շատ օգտակար լինել»։