Տարոն Մարգարյանը գրեթե ոչինչ չի հայտարագրել, տուն չունի, նախորդ տարվա սեփականութուններն ու փողերն էլ չկան։
«Պատիվ ունեմ» խմբակցության պատգամավոր Տարոն Մարգարյանի և տիկնոջ՝ 2022 թվականի ունեցվածքի մասին Hayastan.news-ը տեղեկանում է Կոռուպցիայի կանխարգելման հանձնաժողովից։
2022-ին Տարոն Մարգարյանը նոր մեքենա է գնել՝ 2007 թվականի արտադրության Infiniti, արժեքը՝ 2 մլն 150 հզր դրամ։ Բացի այդ, 1 մլն 200 հզր դրամով էլ BMW մակնիշի ավտոմեքենա է գնել։
Կանխիկ հայտարարագրել է 17 մլն դրամ, ԱԺ-ից, որպես պատգամավոր ստացել է 6 մլն 720 հզր դրամ աշխատավարձ և այլևս ոչինչ չունի, ըստ հայտարարագրի։
Սակայն, 2021 թվականի հայտարարագրում Տարոն Մարգարյանը բավականին հարուստ էր․ հայտարարագրել էր Ջերմուկում հասարակական նշանակության շինությունը, որի համատեղ սեփականատերն է , և որը ձեռք է բերել 2007–ին։
Հայտարարագրել է մեկ «Մերսեդես» մակնիշի ավտոմեքենա՝ 2007 թվականի արտադրության, և որը ձեռք է բերել 2007–ին, բանկային հաշիվներին ուներ 1 մլն 394 հազար ռուսական ռուբլի, 4900 եվրո, 31000 դոլար, անկանխիկ հայտարարագրել էր 89 մլն դրամ, 13000 դոլար, և 40 000 եվրո։ Աշխատավարձը կազմել է 3 մլն 80 հազար դրամ, հանգստի համար ծախսել է 2 մլն 500 հազար դրամ։
Տարոն Մարգարյանի կինը՝ Գոհար Սարգսյանը հայտարարագրել էր 904 եվրո բանկային հաշվին, կանխիկ ուներ 35 մլն դրամ, 8000 եվրո, 7000 դոլար։ Հանգստի համար ծախսել է 2 մլն 100 հազար դրամ։ Չի աշխատում։
Ստացվում է, Տարոն Մարգարյանն ու նրա տիկինը համատեղ՝ կանխիկ ու անկանխիկ ունեին 1 մլն 394 հազար ռուբլի, 54 000 եվրո,128 մլն դրամ և 51000 դոլար։
Հայտարարատուների կողմից տվյալ տարվա ընթացքում 90 օրից ավելի փաստացի տիրապետվող անշարժ գույք նշվել է Ավանի առանձնատունը, որի սեփականատերը Տարոն Մարգարյանի որդին է՝ Նահապետ Մարգարյանը։
2022-ի հայտարարագրերում փոփոխությունը պայմանավորված է այն հանգամանքով, որ Դատախազությունը ապօրինի ծագում ունեցող գույքերի բռնագանձման հայցով դատարան է դիմել, որպեսզի ԱԺ պատգամավորից և նրա ընտանիքի անդամներից բռնագանձվի 11 անշարժ գույք, այդ թվում՝ առանձնատներ։
«Հետք»-ն ուսումնասիրել էր Ավան վարչական շրջանի միայն մեկ փողոցում գտնվող անշարժ գույքերը, դրանց ձեռք բերման հիմքերը և սեփականատերերին։ Պարզել էր, որ իրավապահները Տարոն Մարգարյանի և նրան փոխկապակցված անձանց գույքի ընդամենը մի մասն են հայտնաբերել։ Դատախազության՝ ապօրինի ծագում ունեցող գույքերի բռնագանձման հայցադիմումի մեջ բացակայում է Ավանի Խուդյակովի փողոցում Տարոն Մարգարյանի քույրերին, սանիկին և այլ փոխկապակցված անձանց պատկանող 5 անշարժ գույք։ Ավելին, իրավապահները չեն հայտնաբերել նաև Մարգարյանի սանիկի անունով գրանցված Երևան քաղաքում գտնվող 10-ից ավելի անշարժ գույքերը։
Տարոն Մարգարյանը գրեթե ոչինչ չի հայտարագրել, տուն չունի, նախորդ տարվա սեփականութուններն ու փողերն էլ չկան
14:04, 22 փետրվար 2024