Թուրքիայում մարմնամարզիկ Վահագն Դավթյանը Եվրոպայի փոխչեմպիոն է դարձել, Արթուր Դավթյանը՝ բրոնզե մեդալակիր

18:02, 15 ապրիլ 2023

Թուրքիայի Անթալիա քաղաքում ընթացող մարմնամարզության Եվրոպայի առաջնությունում Հայաստանի ներկայացուցիչներն այսօր երկու մեդալ են նվաճել: Այս մասին հայտնում է ԿԳՄՍ նախարարությունը։

Օլիմպիական խաղերի բրոնզե մեդալակիր Արթուր Դավթյանն այսօր հանդես է եկել նժույգթափերի վարժության եզրափակչում և հավաքելով 14,266 միավոր՝ բրոնզե մեդալ է նվաճել:

Հայաստանի մյուս ներկայացուցիչ Վահագն Դավթյանը Եվրոպայի փոխչեմպիոն է հռչակվել օղակների վարժությունում: Եզրափակչում նա հավաքել է 14,733 միավոր և դարձել արծաթե մեդալակիր: Այս վարժության եզրափակչում Հայաստանի մյուս ներկայացուցիչ Արթուր Ավետիսյանը զբաղեցրել է 7-րդ հորիզոնականը՝ 14,433 միավորով:

Վաղը՝ ապրիլի 16-ին, Արթուր Դավթյանը հանդես կգա հենացատկի եզրափակչում: Օրերս Դավթյանը Եվրոպայի առաջնության բազմամարտի մրցումներում 82.665 միավորով զբաղեցրել էր 4-րդ հորիզոնականը։