Իրանական Tasnim գործակալությունը հրապարակել է «Խորհուրդ ռուսներին. Զանգեզուրի մտացածին միջանցքը չի ստեղծվելու» վերտառությամբ հոդվածը, որում վերլուծել է ՌԴ ԱԳ նախարար Սերգեյ Լավրովի հայտարարությունն առ այն, որ ՌԴ-ն կողմ է Բաքվի և Երևանի միջև խաղաղության պայմանագրի ստորագրմանը և հաղորդակցությունների ապաշրջափակմանը, սակայն, ինչպես ինքն է նշում, «ցավոք, Հայաստանի ղեկավարությունը խոչընդոտում է Սյունիքում հաղորդակցությունների վերաբերյալ Փաշինյանի ստորագրած համաձայնության կատարմանը»։

 

Իրանի բարձրաստիճան պաշտոնյաները քանիցս հայտարարել են, որ Թեհրանը դեմ է միջանցքին, որը սահմանների փոփոխության կհանգեցնի։ Հատկապես ՌԴ ԱԳՆ խոսնակ Մարիա Զախարովայի վերջին հայտարարությունից հետո, թե «Զանգեզուրը երթուղի է, որը կարող է Ադրբեջանը Սյունիքի միջոցով կապել Նախիջևանին, և դրա ապաշրջափակումը կքննարկվի եռակողմ բանակցությունների շրջանակներում», թեման առավել մեծ ուշադրության արժանացավ։

 

Իրանական կողմը հաղորդում է, որ դիվանագիտական օղակներով ռուսական կողմին ուղերձ է փոխանցել. Իրանի ԱԳ նախարարի օգնական Մոջթաբա Դեմիրչիլուն Թեհրանում ՌԴ դեսպանի հետ հանդիպմանը նշել է ինքնիշխանության, տարածքային ամբողջականության ապահովման անհրաժեշտությունը։

Այսպիսով, իրանական գործակալությունը մի քանի կետով ներկայացրել է Իրանի դիրքորոշումը այս հարցում։

 

Ըստ լրատվամիջոցի՝ ՌԴ ԱԳՆ-ն Իրանի սպասելիքներին հակասող հայտարարություններ է անում։

 

«Ռուսաստանը մեր երկրի բարձրաստիճան պաշտոնյաների միջոցով տեղեկացված է եղել Իրանի հստակ դիրքորոշման մասին. մենք դեմ ենք Զանգեզուրի և այլ միջանցքների բացմանը»։

 

Նշվում է, որ Իրանը չի ընդունի իր սահմանների մոտ որևէ փոփոխություն և որ Հարավային Կովկասի ոչ մի երկրի անվտանգությունն ու աշխարհաքաղաքական դիրքը չունի առավելություն մյուս երկրների նկատմամբ։

 

Մեկ այլ դիտարկմամբ գործակալությունը ուշադրություն է հրավիրում այն հանգամանքի վրա, թե ինչո՞ւ է հենց հիմա Ռուսաստանը հայտարարում միջանցքի մասին, երբ Իրանը հայտնել է իր հստակ դիրքորոշումը։

 

«Հաշվի առնելով Պուտինի և Իրանի պաշտոնյաների պայմանավորվածությունները՝ ՌԴ ԱԳՆ հայտարարությունը զարմանք է առաջացնում։ «Ռազմավարական հարաբերություններ» հասկացությունը պետք է վերասահմանել ռուս նախարար Լավրովի համար։

 

Նշվում է, որ իրանական կողմի դիմակայության արդյունքում Զանգեզուրի միջանցք չի ստեղծվի, քանի որ այն փակում է դեպի Եվրոպա Իրանի երքերից մեկը։

 

Գործակալությունը նաև հակամարտության սրում է կանխատեսում։ Մասնավորապես նշում է, որ արևմուտքը կդիմադրի միջանցք բացելու մտքին և այս հակամարտությունը սրման նոր օջախ կառաջացնի Իրանի հյուսիսարևմտյան սահմանների մոտ։