Վրաստանի Կենտրոնական ընտրական հանձնաժողովն անհիմն է անվանել նախագահ Սալոմե Զուրաբիշվիլիի հայտարարությունը՝ կապված արտասահմանում ընտրատեղամասերի բացման հետ, հայտնում է NewsGeorgia-ն։

Գերատեսչությունը կարծում է, որ Զուրաբիշվիլին միացել է իրենց վարկաբեկելու քարոզարշավին, երբ նա ասել է, որ վրացի էմիգրանտների մասնակցությունը քվեարկությանը «դժվար» է եղել, իսկ «ընտրատեղամասերը անհրաժեշտ քանակությամբ բաց չեն եղել»։

«Մենք կոչ ենք անում նախագահին և նրա ներկայացուցիչներին դադարեցնել քաղաքական դրդապատճառներով հարձակումները ընտրական վարչակազմի վրա, ընտրողների շրջանում թյուր պատկերացումներ ստեղծելու փորձերը և դրանով իսկ հարգել ընտրողներին ինչպես երկրի ներսում, այնպես էլ արտերկրում»,- ասված է ԿԸՀ-ի հայտարարության մեջ։

ԿԸՀ-ն կարծում է, որ նախագահն իր հայտարարությամբ վնասում է ընտրական գործընթացին։ Նրանք պարզաբանում են պահանջում նախագահականից։

«Անվանեք այն փաստարկները, որոնց հիման վրա ԿԸՀ-ի որոշումը խտրական եք համարում»,- ասված է հայտարարության մեջ։

Օրենքի համաձայն՝ այլ երկներում ընտրատեղամասերը չեն կարող բացվել, եթե այնտեղ 50-ից ավելի ընտրող չկա։ Օտար երկրում տեղամասեր չբացելու պատճառ կարող է դառնալ նաև քաղաքական կամ ռազմական լարված իրավիճակը։

Խորհրդարանական ընտրություններից մեկ ամիս առաջ՝ սեպտեմբերի 26-ին, Կենտրոնական ընտրական հանձնաժողովը հայտարարեց, որ վրացի էմիգրանտների համար բացելու է 60 ընտրատեղամաս՝ աշխարհի 42 երկրներում։ Վրաստանի արտաքին գործերի նախարարության տվյալներով՝ ընտրելու իրավունք ունի արտերկրում բնակվող 65,5 հազար քաղաքացի։

Ընդդիմությունը կասկածում է, որ մոտավորապես նույնքան քաղաքացի մնացել է առանց ընտրելու իրավունքի։ Հաշվարկվածներից շատերը չեն կարողանա քվեարկել։ Դա անելու համար նրանք ստիպված կլինեն ճանապարհորդել այլ քաղաքներ՝ իրենց բնակության վայրից հարյուրավոր կիլոմետրեր հեռու։

Իշխանությունների հակառակորդները կարծում են, որ ընտրատեղամասերի բացման գործընթացում «Վրացական երազանքի» կառավարությունը միտումնավոր օգտագործել է բոլոր հնարավոր բյուրոկրատական ​​խոչընդոտները։

Վերջին մի քանի ընտրությունները ցույց տվեցին, որ արտագաղթողների մեջ քիչ են «Վրացական երազանքի» կողմնակիցները։ Արտասահմանյան ընտրատեղամասերում ընդդիմությունը գրեթե կրկնակի ավելի շատ ձայն է հավաքում։