Տեղի ունեցողի մեջ աբսուրդն այնքան շատ է ու ակնհայտ, որ այսքանն արդեն բավարար պետք է լիներ բոլորի համար՝ հասկանալու, որ որոշ բաներ անցել են ողջամտության ու ամոթի սահմանը։ Բայց, երբ տեսնում ես, որ արձագանքները համարյա բացակայում են, իսկ հասարակության մի ստվար զանգված «զատո ասֆալտ ունի», փորձում ես ամեն դեպքում բացատրել, թե ինչ է այդ նախագիծը։ Չենք փորձելու մանրամասն հիմնավորել, որ այդ նախագիծն այս օրերին քննարկելը հատկապես անբարոյականություն է, թեև այս անհասկանալի վիճակում ունակ լինել զբաղվել միայն սեփական կյանքն ավելի ու ավելի հարմար դարձնելով, հենց այդպիսի բան է։ Չենք փորձելու, որովհետև վերջնական հասկացել ենք, որ իրենց համար վիճակը բավականին լավ է՝ Կապանի գլխին ծվարած թուրքը իրենց երեխաների ննջասենյակից չէ, որ մի քանի հարյուր մետրի վրա է։ Եվ բացի դա, պաշտոնյաներին քննադատելով ժողովրդի հավատին արժանացած իշխանությունը, վաղուց է նմանատիպ իրավիճակներում տարբեր հնարքներով՝ հակակոռուպցիոն ու այլ նպատակների տակ քողարկելով ավելացրել  պաշտոնյաների վարձատրությունն ու նորացրել նրանց ծառայողական ավտոպարկը։ 

 

 

Կամ, խորհրդարանից ևս մեկը, որպես նախագծի հիմնավորում, հայտարարեց, որ օդանավակայանի հատուկ սրահը սովորական սրահի համեմատությամբ շատ առավելություններ չունի։ Այստեղ մնում է ժպտալ ստի համար ու մի քիչ էլ զարմանալ, թե ինչ առավելություն էր, տեսնես, պատկերացնում պատգամավորը, որ հատուկ սրահում մյուսի համեմատ չկա։ Դե վերջապես, եթե հատուկ առավելություն չկա էլ, ապա կարելի էր ոչ թե պաշտոնյայի ընտանիքի անդամին նեղություն տալ ու բերել հատուկ սրահ, այլ պաշտոնյային տանել սովորական սրահ՝ պետությանն ազատելով նրա համար օդանավակայանում վճարելու բեռից։ Մանավանդ՝ նախագծում, եթե պարզ խոսենք, բացի «մերոնց համար ավելի լավ է» կամ «դուք հո չուզող չե՞ք»-ի մակարդակի պնդումներից, մեծ հաշվով այլ հիմնավորում չկա ու, օրինակ, չկա ոչ մի խոսք այն մասին, թե ինչ ծառայողական անհրաժեշտությունից ելնելով են արտոնություններ տրվում պաշտոնյայի ընտանիքի անդամին։ Հիշո՞ւմ եք, չէ՞, որ առավելություններն ու արտոնությունները միայն ծառայողական անհրաժեշտությունից ելնելով է տրվում, երբ դա պետք է պարտականություներդ ավելի լավ կատարելու համար։ Չեք հիշում, ինչ խոսք․․․

 

 

Օրեր առաջ, երբ Հայաստանի մի քանի պաշտոնատար անձանց անլուրջ արտահայտությունները Հայաստանի համար դիվանագիտական հետևանքներ ունեցան, գրել էինք, որ այդ անձանց դիվանագիտության հետ կապված հետաքրքրում է միայն նրանց դիվանագիտական անձնագիրն ու օդանավակայանի VIP սրահից օգտվելը։ Եվ Հայաստանի դիվանագիտության համար պատասխանատու գերատեսչությունը ղեկավարի տեղակալի մակարդակով որոշել է դա հաստատել՝ ապացուցել, որ Հայաստանի դիվանագիտության ու, ընդհանրապես, արտաքին քաղաքականության բարդ օրերին արտաքին գործերի նախարարությունում զբաղված են պաշտոնյաների ընտանիքի անդամների համար օդանավակայանի VIP -ից օգտվելու հնարավորություն ստեղծելով։